2008年終於完結！08年發生係我身上既事，唔太多亦唔太少！

2008年再一次重返校園，呢個決定需要好大勇氣，而呢個轉變亦令我情緒曾經低落過！曾經令我兩日訓五個鐘頭既地獄溫書時期，最大好處係識到一班同我一樣咁喪既同學仔！曾幾何時，有個亞SIR話︰「係班房入面就係同學，但踏出班房之後唔一定係朋友。」我相信呢句說話，不過亦相信唔係所有野一句話可以講得晒，希望呢班喪友踏出左班房之後大家可以繼續係朋友啦！希望09年可以尋求到我係呢個學科既生存之道啦！PS︰呢間校園真係麻麻地！

2008年可以參與好多表演，如果講中樂的話，今年算係唔錯既一年，我諗如果因為時間唔許可而放棄呢個興趣的話，我一定唔制！因為已經不能以音樂為事業，咁以音樂為興趣就更加唔可以放棄，有時間我一定會返黎練歌，無論係PY定SGI，只要我有時間，我一定返黎架！09年KEEP GOING！希望09年可以尋求到我既8級啦！仲有，二胡！我一定追到你架！

2008年係單身既一年，今年毫無桃花運可言！哈哈！所以09年係「求戀期」！朋友們，有男仔介紹嘛？哈哈！雖然一個人既生活有時真係幾寂寞，不過套用KELLY既歌︰「有時寂寞亦是高興！」不過，有時寂寞好喇，唔好長期寂寞呀！加油啦！09年尋找伴侶的一年！對呀！是伴侶呀！不是男朋友！

2008年有兩位好朋友結婚喇！其中一個仲生埋個小B女添！真係恭喜晒呀！彪彪做人老豆要生性喇！知道嘛！哈哈！D頭你又幾時生返個呀？哈哈！兩個都咁貪玩，結果兩個都結婚，步入人生既另一個階段，恭喜！

2008年郭家發生大事，到底算唔算係大事呢？我地全家都唔多知道，就算係當事人都未必知道，全家五個人只係知道有事發生左，不過完全唔識點去解決，事情延至09年，希望09年我既家人可以尋找到自己想要既野啦！當然包括我自己啦！我都係郭家既一份子！五個人！缺一不可！

2008年工作上，有人離開，有人加入！整個08年自己對於工作上既表現其實並唔滿意，總係hea住hea住咁過日子！難道社福畀真係做又36唔做又36？我相信唔係！今年轉左新環境工作，對住一班亞太級既女人，又要對住一個冇咩方向感既男人，每日返工都要鬥智鬥力！希望09年可以係工作上尋求突破！每將來做好準備！我地既潘文迪小姐要離開我地呢個大家庭，佢釣左個金龜婿喇！哈哈！好好enjoy啦！

隨住08年既過去，09年希望有一個新開始！雖然09年1月1日開始，心情就異常地差！原因我係知道既，所以我要動用新相識既佛洛依德先生既自我防衛機制之一既壓抑！哈哈！！

咁多位朋友仔！09年！加油呀！！！